नायक आर्यन सिग्देल राम्रो र स्वभाविक अभिनय गर्ने नायकको रुपमा चिनिन्छन् । प्रायः चलचत्रिमा ‘लभर ब्वाई’को रुपमा देखिने आर्यन बलिउडका सलमान खानबाट निकै प्रभावित छन् ।
चलचित्रको पर्दामा मायाप्रीतिका कुरा मात्र नभएर सलमान खान झैं एक्सन पनि गर्न सक्ने खुबी आफुमा रहेको बताउने उनी यतिबेला चलचित्र ‘महसुस’को प्रोमोसनमा ब्यस्त छन् ।
आर्यन फिल्मस्को ब्यानरमा ‘नोबेम्बर रेन’ नामक चलचित्र निर्माण गर्ने भनेर उद्घोष गरेका आर्यनले अहिलेसम्म किस्मत, मेरो एउटा साथी छ, हिफाजत, फस्ट लभ, द फल्यास ब्याक, कोही मेरो, बन्दी, कस्ले चोर्यो मेरो मन, के यो माया हो, सपना, मेरो लभ स्टोरी, आई एम सरी, धुवा यो नशा, दबाब लगायत चलचित्रमा अभिनय गरिसकेका छन् ।
काठमाडौं थानकोटका स्थायी बासिन्दा आर्यन अहिले महाराजगञ्जमा बस्दै आएका छन् । पछिल्लो समय ‘लभ लाईफ’को कुराले आर्यन चर्चामा छन् । काठमाडौं स्थाई घर भएकी सपना भण्डारीसँग आर्यनको ‘इलु इलु’ चलिरहेको छ ।
भर्खरै (श्रावण २१ गते) उनले आफ्नो जन्मदिन प्रेमिका सपनासँगै मनाए । चलचित्र खेल्नमा ‘चुजी’ देखिएका आर्यन चलचित्रमा काम गरेबापत निकै राम्रो पारिश्रमिक लिने नायकमा पर्छन् । उनै नायक आर्यन सिग्देलसँग उज्यालो अनलाइनका लागि अर्जुनकुमार संग्रौलाले गरेको कुराकानी :
अहिले केमा ब्यस्त हुनुहुन्छ ?
चलचित्र ‘महसुस’ यही श्रावण ३२ गते रिलिज हुँदैछ । महसुसकै प्रोमोसनमा ब्यस्त भईरहेको छु । राम्रो ‘टिम’ले बनाएको राम्रो कथाबस्तु बोकेको चलचित्र भएकोले गर्दा पनि महसुसले दर्शकको मन जित्न सफल हुन्छ भन्ने आशा लिएको छु । चलचित्रको बारेमा सबैले थाहा पाउन भनेर चलचित्र प्रचार प्रसारमा समय दिईरहेको छु ।
चलचित्र महसुस कस्तो चलचित्र हो ?
मैले काम गरेका चलचित्रहरुमध्ये महसुस पनि म आफैलाई मन पर्ने चलचित्र भित्रमा पर्छ । यो चलचित्रलाई म पारिवारीक त्रिकोणात्मक चलचित्र भन्न रुचाउँछु । ‘वेल एजुकेटेज म्याचोर्ड’ केटी विद्याको भूमिकामा बेनिशा हमाल छिन । ग्रामिण परिवेशबाट आएको, पढाई कम भएपनि मन सफा भएको गौरीको भूमिकामा केकी अधिकारीलाई देख्न सक्नुहुनेछ ।
काममा परिवक्क विश्व नामको ‘क्यारेक्टर’मा म प्रस्तुत भएको छु । यिनै तीनजना क्यारेक्टरको बीचमा हुने मायाप्रेमको कुरालाई चलचित्रले प्रस्तुत गरेको छ । र मलाई आशा छ, चलचित्रलाई सबै उमेर समूहकाले महसुस गर्न सक्नुहुनेछ । हाँस्ने ‘सिन’मा हाँस्न र रुने ‘सिन’मा रुवाउन सफल हुनेछ, महसुस ।
यसअवधिमा निकै समय खाली हात बस्नुभयो नि, कारण के थियो ?
हेर्नुस, म जुन पायो त्यही चलचित्रमा काम गर्दिन । मलाई स्क्रिप्ट मनपर्यो, टिम मनपर्यो भने मात्र काम गर्छु । प्रस्ताव आएजति सबै चलचित्रमा काम गर्ने हो भने म बाह्रै महिना ‘बिजी’ हुनसक्छु । तर म चलचित्रको संख्या बढाउनु भन्दा पनि गुणात्मक चलचित्रमा मात्र काम गर्न रुचाउँछु । जबसम्म म आफैं चलचित्रको स्क्रिप्टबाट सन्तुष्ट हुन सक्दिन, तब सम्म काम गर्दिन । बरु म ‘फ्रि’ नै बस्छु ।
बिचमा निर्माता, निदेशकहरुसँग तपाईंको सम्बन्ध बिग्रनुको कारण के थियो ?
बिचमा होईन, सुरुवात देखि नै हो । हेर्नुस्, म काम गर्न चलचित्र उद्योगमा आएको हो । न कि कसैसँग सम्बन्ध बनाउन । निर्माता, निर्देशकलाई सधैं भेट्न जाउँ, सधैं फोन गरौं, यस्ता कुरालाई मैले कहिल्यै महत्व दिईन । म एउटै कुरामा सधैं ध्यान दिन्छु कि म जोसँग काम गर्छु, त्यो मान्छेलाई मैले कामबाट सन्तुष्ट पार्न सकूँ । मसँग भेट्दै नभेटी, मसँग काम नै नगरी मेरो पछाडि कुरा काट्दै हिँड्ने मान्छेहरुलाई मेरो केही भन्नु छैन । फेरि मेरो आफ्नै किसिमको बानी पनि छ, कामको बेला म एकदमै
‘डेडिकेटेड’ भाएर काम गर्छु र काम सकेपछि म त्यति सम्पर्कमा रहन चाहन्छ । म एक्लै आनन्दले बस्न रुचाउँछु । मलाई एकान्तमा बस्न मन पर्छ । सायद त्यही भएर पनि मेरो बारेमा निर्देशक निर्माताहरुले त्यस्तो धारणा बनाउनु भएको होला । सुनेको छु कस कसैले असामाजिक पनि भन्छन रे । तर मेरो बानी नै यस्तै छ त म के गरौं ?
विवाहपछि पनि एक्लै बस्न रुचाउनु भयो भने त गार्हो होला नि ?
हा हा हा (लामो हाँसो)... विवाह पछि त्यस्तो नहोला । कसैलाई सात जन्म साथ दिन्छु भनेर बाचा गरेर ल्याई सकेपछि त उसको पनि विचार त गर्नै पर्यो नि । विवाह पछि मेरो आदत र बानी परिवर्तन हुन पनि त सक्छ नि ।
प्रेमिका (सपना भण्डारी)लाई श्रीमती बनाएर कहिले घर भित्र्याउँदै हुनुहुन्छ ?
यो विषयमा अहिले नै म केही भन्न सक्दिन । एक्लो जिन्दगी धेरै बिताईयो, बिहे त गर्छु नै । तर बिहे कहिले गर्ने भन्ने विषयमा भने अहिले त्यस्तो केही ‘प्लानिङ्ग’ छैन । भोलि नै पनि हुन सक्छ, एक बर्ष पछि पनि हुन सक्छ, या त पाँच बर्ष लाग्न पनि सक्छ । ढुक्क हुनुस्, बिहेको निम्तो चाहिँ तपाईलाई नै पहिले दिउँला हा हा हा.... । अहिलेलाई यो विषयमा यति नै ।
सपना भण्डारीलाई पहिलो पटक भेट्दाको महसुस कस्तो थियो ?
त्यो महसुस एकदमै राम्रो थियो । अहिलेसम्म पनि त्यो महसुस ताजै छ । नानु (सपना भण्डारी) को र मेरो भेट फेसबुकले गराएको हो । फेसबुकमा कुराकानी हुँदाहुँदै माया बसेको हो । यो सम्बन्धलाई म फेसबुकले जुराएको सम्बन्ध भन्न रुचाउँछु । भर्खरै नानुसँग जन्मदिन पनि सँगै मनाएँ । एकदमै खुशी छु ।
पहिले पहिले राती मापसे गरेर शहर घुम्दाघुम्दै बिहानको ५ पनि बज्थ्यो रे नि, अहिले पनि त्यस्तै हो ?
काठमाडौंमा राती घुम्ने ठाउँ नै पो कहाँ छ र ? ९ बजेपछि सबै बन्द भईहाल्छ । तर जे होस राती एक्लै ‘ड्राईभ’ गर्नु खुब रमाईलो लाग्छ । तर पिएर ‘ड्राईभ’ गर्ने बानी छैन । मापसे चेकिङ्ग पनि त छ, आजकाल । पहिलापहिला बारमा बसेर पिउँदै जाँदा भने कहिलेकाहीँ उज्यालो हुन्थ्यो । तर आजकाल त त्यो एकादेशको कथा जस्तो मात्रै हो । अहिले सबै छाडिसके । ममा आजकाल परिवर्तन आउँदैछ । पहिला भन्दा म निकै बदलिईसकें । यसको श्रेय पनि केही हदसम्म नानुलाई नै जान्छ ।
नायिका रेखा थापासँग बोलचाल छ कि छैन ?
रेखा थापाको नाम राखेर मलाई प्रश्न नसोध्नुस् । मैले यो ‘टपिक’मा धेरैचोटी कुरा गरिसकें । अब यो ‘टपिक’मा कुरै नगरौं ।
फिल्मी अवार्ड त धमाधम जीवन लुर्इंटेलले नै लाँदै हुनुहुन्छ । जीवनसँग इर्ष्या लाग्छ होला है ?
हैन, कस्तो कुरा गर्नुभएको तपाईंले ? मलाई जीवनसँग किन इर्ष्या लाग्नु पर्यो र । उसले खेलेको फिल्म ‘हिट’ भैरहेको छ । उसले राम्रो काम गरिराखेको छ त अवार्ड पनि उसैले लान्छ नि । मैले टाउको दुखाएर हुन्छ र ? जीवन लुर्इंटेलको बारेमा सोध्नुहुन्छ भने उ एकदमै राम्रो कलाकार हो । अहिले उ मभन्दा माथि छ । किनभने उसले मभन्दा धेरै चलचित्रमा काम गरिरहेको छ । म अलि ‘चुज’ गरेर मात्रै चलचित्र गरिरहेको छु । त्यसैले सबै हिरोहरु मभन्दा अगाडि छन् ।
